KOFA-sekretariatet har no igangsett eit samarbeid med forskargruppa for konkurranse- og marknadsrett ved juridisk fakultet på UiB. Fagområdet har vore eit satsingsfelt for UiB, og gruppa har fleire forskingsprosjekt som omhandlar offentlege anskaffingar. UiB tilbyr også valemnet «EU and EEA Public Procurement Law».
Blant felles aktivitetar nemnast at juristar frå sekretariatet vil bidra med tilleggsundervising frå eit praktisk perspektiv på kurset «EU and EEA Public Procurement Law» hausten 2015. I tillegg har medlemmar frå forskargruppa blitt invitert til å delta på seminarar og konferansar organisert av KOFA, slik som KOFA sin årlege fagkonferanse. KOFA tilbyr også sommarjobb, skriveplass og masterstipend til studentar kvart år.
Dersom du er interessert i å vite meir om samarbeidet med forskargruppa, ta gjerne kontakt med sekretariatsleiar Erlend Pedersen. Ynskjer du informasjon om kurset i offentlege anskaffingar eller høvet til å skrive masteroppgåve innan emnet, kan du ta kontakt med stipendiatane Ignacio Herrera Anchustegui eller Linda Midtun.
Publisert: 13.03.2015 | Sist endret: 29.06.2015